जळगाव - खान्देश कॉलेज एज्युकेशन सोसायटी संचलित शिक्षणशास्त्र आणि शारीरिक शिक्षणशास्त्र महाविद्यालयात राष्ट्रीय क्रीडा दिनानिमित्त क्रीडा पोषणावरील आंतरराष्ट्रीय ई-कार्यशाळेचे आयोजन करण्यात आले होते. या ऑनलाईन कार्यशाळेत भारतामधून तसेच भारताबाहेरील एकूण 750 सदस्य सहभागी झाले होते.
या कार्यशाळेचे उद्घाटन कवयित्री बहिणाबाई चौधरी उत्तर महाराष्ट्र विद्यापीठाचे कुलगुरू प्रा. पी पी पाटील यांनी केले. तसेच याप्रसंगी मु. जे. महाविद्यालयाचे प्राचार्य डॉ. संजय भारंबे, उच्च शिक्षण सहसंचालक जळगाव डॉ. सतीश देशपांडे, विद्यापीठाचे क्रीडा संचालक डॉ. दिनेश पाटील, शिवछत्रपती पुरस्कार प्राप्त डॉ. प्रदीप तळवलकर व डॉ.तारक दास, महाविद्यालयाचे प्राचार्य डॉ. अशोक राणे हे उपस्थित होते.
महाविद्यालयाचे प्राचार्य डॉ. अशोक राणे हे या कार्यक्रमाच्या अध्यक्षस्थानी होते. त्यांनी दीपप्रज्वलन व मेजर ध्यानचंद यांचे प्रतिमा पूजन करून कार्यक्रमाची सुरुवात केली. त्यानंतर या कार्यशाळेचे समन्वयक प्रा. निलेश जोशी यांनी या कार्यशाळेची पार्श्वभूमी थोडक्यात नमूद केली.
या कार्यशाळेचे प्रमुख वक्ते औरंगाबाद येथील शारीरिक शिक्षणशास्त्र महाविद्यालयाचे प्राचार्य डॉ. शत्रुंजय कोटे यांनी सर्वंकष क्रीडा पोषणाची संकल्पना मांडली. त्याच प्रमाणे या कार्यशाळेस लाभलेले आंतरराष्ट्रीय वक्ते युलिया डेमचेन्को यांनी क्रीडा पोषणासंबंधीची मार्गदर्शक तत्वे नमूद केली. त्यानंतर दुसरे आंतरराष्ट्रीय वक्ते श्री सुरजीत संधू यांनी क्रीडा पोषणाचे महत्व सांगून त्याचा खेळाडूच्या जीवनातील प्रभाव नमूद केला.
यानंतरच्या सत्रांमध्ये या कार्यशाळेत विशेष आमंत्रित वक्त्यांनी उपस्थितांना मार्गदर्शन केले. ज्यामध्ये शिवछत्रपती क्रीडा पुरस्कार प्राप्त क्रीडा विशेषज्ञ अपूर्वा सुर्वे यांनी प्रशिक्षण पूर्व, प्रशिक्षणाच्या दरम्यान आणि प्रशिक्षणाच्या नंतर आवश्यक असलेले पोषण यासंबंधी अतिशय मौलिक मार्गदर्शन केले. तसेच दुसरे आमंत्रित वक्ते उमंग गंगापूरकर यांनी खेळाडूंचे कार्यमान उंचावण्यासाठी अपेक्षित असलेले पोषण व उच्च स्निग्धांश असलेला आहार यासंबंधी मार्गदर्शन केले.या कार्यक्रमाचे संचालन कार्यशाळेचे समन्वयक प्रा. निलेश जोशी यांनी केले. तर आभार प्रदर्शन महाविद्यालयाचे उपप्राचार्य डॉ. केतन चौधरी यांनी केले. या कार्यशाळेच्या यशस्वितेसाठी प्रा. प्रवीण कोल्हे, प्रा. पंकज पाटील, मोहन चौधरी तसेच महाविद्यालयातील सर्व शिक्षक व शिक्षकेतर कर्मचार्यांचे सहकार्य लाभले.
